Trajneri i Inter Milan, Cristian Chivu, është shprehur optimist në prag të derbit ndaj AC Milan, duke theksuar se skuadra e tij është më e fortë mendërisht krahasuar me fillimin e sezonit.
Chivu bëri të ditur se sulmuesi Marcus Thuram ka pasur probleme shëndetësore dhe nuk është stërvitur për shkak të etheve, por shpresohet që të jetë plotësisht gati për ndeshjen. Ndërkohë, mesfushori Hakan Çalhanoğlu është në dispozicion dhe po tregon shenja të mira forme pas paraqitjes në ndeshjen ndaj Como.
Trajneri rumun theksoi se humbja ndaj Napoli në ndeshjen e parë të sezonit ishte një pikë kthese për ekipin në aspektin psikologjik. “Jemi të qetë dhe të vetëdijshëm se po përballemi me një ekip të fortë që mund të na shkaktojë probleme. Milani ka disa lojtarë shumë cilësorë dhe duhet të jemi në formën tonë më të mirë,” u shpreh ai.
Chivu shtoi se skuadra nuk duhet të ndryshojë identitetin e saj dhe duhet të kuptojë momentet e ndeshjes pa humbur cilësitë që e kanë sjellë deri këtu. Ai vlerësoi edhe të riun Francesco Pio Esposito, duke theksuar se po zhvillon një sezon mbresëlënës dhe po menaxhon mirë presionin.
Në fund, i pyetur për trajnerin Massimiliano Allegri, Chivu pati vetëm fjalë vlerësimi: “Jam personi i fundit që mund të flas për Maxin, sepse ai ka fituar gjashtë tituj kampion dhe shumë trofe të tjerë. Nga ai mund të mësojmë vetëm.”