Autoriteti Kombëtar për Sigurinë Kibernetike ka reaguar pas ndërprerjes së madhe që goditi këtë të martë platformën ndërkombëtare “Cloudflare”, duke theksuar se incidenti u shkaktua nga një problem i brendshëm që ndikoi drejtpërdrejt në disponueshmërinë e shërbimeve të kompanisë.
Sipas AKSK, ndërprerja e 18 nëntorit 2025 pati ndikim global, duke prekur rrjetin Edge, API-të dhe disa komponentë kritikë të platformës. Problematika nisi rreth orës 12:48, duke shkaktuar vështirësi edhe në vendin tonë, ku disa institucione dhe sektorë u përballën me pamundësi për të aksesuar shërbime dhe faqe digjitale.
Cloudflare njoftoi se rreth orës 15:42 situata po stabilizohej dhe se pritet rikthimi i plotë i shërbimeve, duke e cilësuar ngjarjen si të përkohshme.
Rekomandimet e AKSK
Autoriteti u bën thirrje përdoruesve dhe institucioneve që përdorin shërbime të Cloudflare të:
rrisin vigjilencën dhe të kryejnë kontrolle të vazhdueshme për disponueshmërinë e shërbimeve të tyre;
identifikojnë çdo shërbim të prekur për probleme pas ndërprerjes;
sigurojnë mekanizma alternative që garantojnë funksionimin bazë në raste avarish të ngjashme, për të kufizuar rrezikun operacional.
AKSK thekson se mbetet e angazhuar në garantimin e sigurisë së infrastrukturave të informacionit dhe në informimin në kohë reale të publikut për çdo rrezik të mundshëm.