“Tetori i matur” po fiton gjithnjë e më shumë ndjekës në Mbretërinë e Bashkuar dhe në vende të tjera, teksa mijëra njerëz zgjedhin të heqin dorë nga alkooli për një muaj të tërë, për t’i dhënë trupit dhe mendjes një “reset” të nevojshëm.
Sipas Dr. Suzanne Wylie, mjeke e përgjithshme dhe këshilltare mjekësore në IQdoctor, efektet pozitive të ndërprerjes së konsumit të alkoolit nisin të shfaqen shumë më shpejt nga sa mendojmë. “Edhe në sasi të moderuara, alkooli ndikon në gjumin, humorin, peshën trupore dhe rrit rrezikun për sëmundje të zemrës, kancer apo probleme me mëlçinë. Një pushim njëmujor është një mënyrë shumë e mirë për t’u rikuperuar,” shpjegon ajo për ladbible.com.
Java e parë – Gjumi dhe energjia
Në ditët e para, trupi fillon të pastrohet nga mbetjet e alkoolit dhe mëlçia nis procesin e rikuperimit. Cilësia e gjumit përmirësohet ndjeshëm, energjia stabilizohet gjatë ditës dhe përqendrimi rritet. Lëkura duket më e pastër falë hidratimit më të mirë dhe reduktimit të inflamacionit.
Java e dytë – Mëlçia “merr frymë”
Pas dy javësh, funksioni i mëlçisë përmirësohet ndjeshëm. Nivelet e enzimave që tregojnë stresin e këtij organi bien, ndërsa tretja bëhet më e mirë pasi mukozat e stomakut qetësohen nga mungesa e irritimit që shkakton alkooli.
Java e tretë – Mendje më e kthjellët, presion më i ulët gjaku
Në këtë fazë, ndryshimet janë të dukshme: humori stabilizohet, mendja bëhet më e qartë, kujtesa dhe përqendrimi përmirësohen. Presioni i gjakut fillon të ulet, duke reduktuar rrezikun për sëmundje kardiovaskulare.
Pas një muaji – Trupi “rivendoset”
Pas katër javësh, trupi është përshtatur me një ritëm të ri. Testet e funksionit të mëlçisë dhe nivelet e kolesterolit tregojnë përmirësime të dukshme. Shumë njerëz raportojnë se ndihen më mirë fizikisht dhe emocionalisht — dhe kuptojnë se mund të argëtohen edhe pa alkool.
Një marrëdhënie e re me alkoolin
Edhe pse kthimi te zakonet e vjetra mund të zhbëjë përfitimet, një muaj abstinence është i mjaftueshëm për të “rivendosur” ekuilibrin e trupit. Shumë persona që marrin pjesë në fushata si “Janari i Tharë” apo “Tetori i Matur” raportojnë ndryshime afatgjata në mënyrën si e shohin dhe konsumojnë alkoolin.
“Një pushim nga alkooli nuk është thjesht detoksifikim,” përfundon Dr. Wylie. “Është një mundësi për të parë se sa më mirë mund të funksionojë trupi dhe mendja pa të.”