SHBA– Artistja me famë botërore, Britney Spears ka fshirë llogarinë e saj personale në Instagram, pas postimeve që kishin shkaktuar shqetësim tek fansat e saj dhe një përballjeje publike me ish-bashkëshortin e saj, Kevin Federline.
E gjitha kjo në lidhje me atë që ai zbulon për martesën e tyre në librin e tij të ri. Prej ditës së djeshme, 2 Nëntor 2025 profili i Spears në Instagram nuk është më i arritshëm. Konkretisht, kur kërkoni emrin e llogarisë së saj, shfaqet një mesazh që thotë “profili i padisponueshëm”.
Fshirja erdhi pas javësh shqetësimi nga fansat për postimet e saj të çuditshme dhe të ngarkuara emocionalisht. Konkretisht, Britney Spears postoi video të saj duke kërcyer në dhomën e saj të ndenjes, por i çaktivizoi komentet, ndërsa mbishkrimet e saj përmbanin referenca misterioze për dy djemtë e saj, Sean Preston dhe Jaden James.
Në një video që postoi më 7 tetor, Spears u shfaq me mavijosje në duar dhe fasha në kyçe. Në mbishkrim, ajo shpjegoi se kishte rënë nga shkallët, ndërsa përmendi gjithashtu se djemtë e saj ishin kthyer në Hawaii, ku jetojnë me babanë e tyre. “Djemtë e mi u detyruan të largoheshin dhe të ktheheshin në Maui.”– shkroi ajo.
“Kështu shprehem dhe lutem përmes artit. Nuk dua shqetësimin apo mëshirën tuaj, dua vetëm të jem një grua e mirë dhe të shërohem. Dhe kam mbështetje të jashtëzakonshme, kështu që kalofshi një ditë të mbarë. Rashë nga shkallët në shtëpinë e një shoqeje. Ishte e tmerrshme. Shpatulla ime del herë pas here, nuk jam e sigurt nëse është thyer, por tani për tani është ‘kthyer’ përsëri në vend. Faleminderit Zotit.“- shtoi ajo./Radar.al