TIRANË– Sipas Presidencës autorizimi është dhënë në mbështetje të Kushtetutës së Shqipërisë dhe ligjit për marrëveshjet ndërkombëtare.
Në dokument theksohet se kompetencat, të drejtat dhe detyrimet që rrjedhin nga lëshimi i kësaj plotfuqie, si dhe përfaqësimi i Shqipërisë, nuk mund të delegohen te asnjë autoritet apo organ tjetër publik.
Ushtrimi i tyre është i detyrueshëm dhe duhet të bëhet në përputhje të plotë me ligjin.
AUTORIZIM PËR LËSHIMIN E PLOTFUQISË PËR NËNSHKRIM MARRËVESHJEJE
Në mbështetje të nenit 92, shkronja “e”, të Kushtetutës së Republikës së Shqipërisë, nenit 5, pika 2, si dhe nenit 6, pika 1 dhe 3, të ligjit nr. 43/2016, “Për marrëveshjet ndërkombëtare në Republikën e Shqipërisë”, të ndryshuar, autorizoj Sh.T.Z. Edi Rama, Kryeministër i Republikës së Shqipërisë, për nënshkrimin e “Marrëveshjes së pranimit të Republikës së Shqipërisë në Kartën e Bordit të Paqes”, miratuar në parim me vendimin nr. 45, datë 21.1.2026, të Këshillit të Ministrave.
Kompetencat, të drejtat dhe detyrimet që rrjedhin nga lëshimi i kësaj plotfuqie, si dhe përfaqësimi i Republikës së Shqipërisë sipas këtij autorizimi, nuk mund të delegohen te asnjë autoritet apo organ tjetër publik. Ushtrimi i tyre nga autoriteti i përcaktuar në këtë autorizim është i detyrueshëm, në përputhje me ligjin./Radar.al
