Partia Socialiste ka nisur zyrtarisht përgatitjet për zgjedhjet e ardhshme parlamentare të vitit 2025, dhe duket se një nga surprizat më të mëdha është prezantimi i Bora Muzhaqit si kandidate e PS për zonën e Librazhdit dhe Përrenjasit. Muzhaqi, e cila ka lindur në Elbasan dhe ka lidhje familjare me zonën e Librazhdit, është përfolur si deputetja e ardhshme e këtyre dy zonave.
Drejtuesi i ri politik i PS për qarkun e Elbasanit, Arbjan Mazniku, ka nisur zyrtarisht fushatën duke zhvilluar takime në Librazhd dhe Përrenjas, ku Bora Muzhaqi u vu menjëherë në qendër të vëmendjes. Në krah të tyre ishte dhe Taulant Balla, deputeti me më shumë eksperiencë në qarkun e Elbasanit, i cili mbështeti prezantimin e skuadrës së re.
Në fjalën e tij, Mazniku deklaroi: “Në Librazhd, me kolegët Taulant Balla, Bora Muzhaqi dhe kryetarin e bashkisë Mariglen Disha, kemi ndezur motorët për zgjedhjet e vitit që vjen. Ky mandat i ri qeverisës do të na çojë drejt anëtarësimit në Bashkimin Europian, me kokën lart dhe të barabartë me europianët.”
Mazniku theksoi arritjet e PS në qeverisje, duke përmendur rritjen e pagave, dyfishimin e të ardhurave, heqjen e TVSH-së për biznesin e vogël dhe shndërrimin e turizmit në një industri fitimprurëse. “Në 2025, qytetarët e Librazhdit do t’i besojnë sërish PS, si e vetmja forcë e përgjegjshme që i çon punët deri në fund,” përfundoi ai.
