Pensionistët do të përfitojnë një bonus të rritur këtë fundvit, pasi qeveria ka rishikuar për herë të tretë buxhetin e shtetit. Një fond prej 5.9 miliardë lekësh do të shpërndahet për rreth 756 mijë pensionistë në muajin dhjetor, duke siguruar një bonus të ngjashëm me vitin e kaluar, por me një masë të rritur të përfitimit.
Qeveria ka theksuar se ky shpërblim do të përmirësojë nevojat e pensionistëve si një shtresë vulnerabël, duke ofruar një siguri dhe mbështetje shtesë për ta.
Pjesë e ndryshimeve të buxhetit është edhe rritja e fondeve për Ministrinë e Infrastrukturës dhe Energjisë, që do të marrë 60 milionë euro shtesë për avancimin e projekteve rrugore dhe hekurudhore, si dhe për investimet në Albkontroll dhe AKSH.
Rritje buxheti ka edhe për Ministrinë e Drejtësisë, Ministrinë e Bujqësisë për programin e ujitjes, si dhe për rikonstruksionet e godinave të disa institucioneve shtetërore.
Në nivelin e njësive të vetëqeverisjes vendore, janë rritur transfertat e pakushtëzuara për sektorë si Mbrojtja nga Zjarri, ndërsa disa bashki kanë përfituar financime për mosrealizimin e të ardhurave të nevojshme.
Me këto ndryshime, të ardhurat pritet të arrijnë në 7.7 miliardë euro, ndërsa shpenzimet do të rriten në 8.3 miliardë euro, duke mundësuar avancimin e mëtejshëm të projekteve dhe mbështetje për kategoritë më vulnerabël.
Vendimet e marra janë të menjëhershme në fuqi, pas botimit të aktit normativ në Fletoren Zyrtare.