Rruga e Arbrit është bllokuar në afërsi të tunelit të Murrizit si pasojë e reshjeve të dendura të dëborës dhe qarkullimit të automjeteve pa goma dimërore dhe zinxhirë. Situata ka shkaktuar vështirësi serioze në lëvizjen e mjeteve, duke krijuar radhë të gjata dhe ngadalësim të ndjeshëm të qarkullimit.
Sipas raportimeve nga terreni të korrespondentit të RTSH-së, Elvis Hila, mjetet borëpastruese ndodhen në aks dhe po punojnë për pastrimin e rrugës dhe rikthimin e qarkullimit normal. Autoritetet u bëjnë thirrje drejtuesve të mjeteve të shmangin udhëtimin pa pajisje dimërore dhe të respektojnë udhëzimet e Policisë Rrugore.
Nga ana e saj, Policia e Shtetit apelon për kujdes maksimal në lëvizje, pasi moti i keq është shoqëruar jo vetëm me dëborë, por edhe me reshje intensive shiu dhe breshëri. Sipas policisë, kushtet janë veçanërisht problematike në zonat malore, ku ka prani të ngricave dhe akullit, duke rritur rrezikun për aksidente.
“Për shkak të motit të keq, me reshje shiu, breshëri dhe dëbore, Policia e Shtetit u bën thirrje drejtuesve të automjeteve dhe motomjeteve të tregojnë vigjilencë të shtuar gjatë qarkullimit. Në zonat malore, drejtuesit duhet të kenë me vete mjete antirrëshqitëse dhe të përdorin goma dimërore. Shërbimet e Policisë po koordinojnë punën me firmat e mirëmbajtjes së rrugëve për pastrimin në kohë të akseve problematike”, thuhet në njoftimin zyrtar.