Kreu i Partisë Demokratike, Sali Berisha, zhvilloi një takim me Kryepeshkopin e Kishës Ortodokse Autoqefale të Shqipërisë, Fortlumturinë e Tij, Joan, pas një vizite në ambientet e kishës.
Në fjalën e tij, Berisha vlerësoi punën e Kryepeshkopit Joan dhe trashëgiminë e lënë nga Imzot Anastas Janullatos. Ai theksoi se ringjallja e besimit fetar në Shqipëri është një dëshmi e fortë e përkushtimit dhe sakrificës së klerikëve ortodoksë.
“Punën e madhe dhe të çmuar që bëni është vazhdim i veprës së pavdekshme të Imzot Janullatos, i cili e ngriti Kishën Ortodokse nga rrënojat me një përkushtim të jashtëzakonshëm,” u shpreh Berisha.
Ai e krahasoi ringjalljen e besimit me rilindjen e pluralizmit politik në Shqipëri, duke theksuar se të dyja janë përballur me përpjekje për zhdukje, por kanë mbijetuar dhe sot janë të fuqishme.
“Ashtu siç u përpoqën të zhduknin fenë, u përpoqën të zhduknin edhe pluralizmin. Por sot, pluralizmi është më i fortë se kurrë, edhe pse kaloi prova të mëdha,” deklaroi Berisha.
Në një deklaratë për mediat jashtë kishës, ai nënvizoi edhe njëherë se opozita shqiptare është ringjallur, duke e krahasuar me një simbol të shpresës dhe forcës.
“U përpoqën ta fshijnë edhe opozitën, por ajo u ringjall dhe sot është më e fuqishme se kurrë, për të përzënë të keqen nga trojet shqiptare.”
Berisha përfundoi me urime për besimtarët ortodoksë me rastin e Pashkës, duke theksuar rëndësinë shpirtërore dhe shoqërore të ringjalljes së Krishtit dhe të besimit në vendin tonë.