Kryetari i Partisë së Lirisë, Ilir Meta, ka kërkuar zyrtarisht që të thirret nga SPAK për të dhënë dëshminë e tij lidhur me ngjarjet e 21 janarit, duke deklaruar se disponon prova të rëndësishme për zbardhjen e plotë të asaj dite tragjike.
I pyetur për këtë kërkesë, lideri i opozitës Sali Berisha u shpreh se nuk përjashton mundësinë që Meta të ketë informacione të vlefshme, pasi deri pak ditë para 21 janarit ka mbajtur postin e zëvendëskryeministrit.
“Ilir Meta mund të dijë diçka, sepse ka qenë zëvendëskryeministër. Më 14 apo 15 janar ai erdhi në zyrën time dhe më tha se do të jepte dorëheqjen, sepse nuk pranonte të paraqitej në prokurori si zv.kryeministër,” deklaroi Berisha.
Por kreu i PD-së solli në vëmendje edhe një episod tjetër të asaj periudhe, një bisedë me ish-ministrin e Energjetikës, Dritan Prifti, para se të publikohej video-përgjimi famëkeq mes tij dhe Metës.
“Sipas asaj që kam dëgjuar, Dritan Prifti kërkonte të emërohej në një detyrë tjetër të rëndësishme. Përndryshe, më tha se kishte një regjistrim,” tregon Berisha.
Ai shtoi se përgjigjja e tij ka qenë e prerë: “I thashë: nxirre menjëherë, sapo të dalësh nga dera e zyrës sime. Nxirre! Kjo është e vërteta. Askush nuk më merr dot peng.”