Një shqiptar 36-vjeçar, i shpallur në kërkim ndërkombëtar si pjesë e një bande të specializuar në vjedhje banesash dhe vilash, është ekstraduar nga Spanja drejt Italisë. Sipas mediave italiane, i dyshuari mbërriti në aeroportin Linate të Milanos, ku u shoqërua menjëherë në paraburgim.
Ai ishte arrestuar disa ditë më parë në Spanjë, pas lëshimit të urdhër-arrestit ndërkombëtar për pjesëmarrje në organizatë kriminale, vjedhje banesash dhe përvetësim të mallrave të vjedhura. Hetimi ishte zhvilluar nga Skuadra Fluturuese e Milanos, nën koordinimin e Prokurorisë së Milanos, dhe kishte përfunduar në dhjetor 2024 me arrestimin e dy shqiptarëve të tjerë, të dyshuar për të njëjtat krime.
Autoritetet italiane bëjnë me dije se banda vepronte me një skemë të mirëorganizuar: identifikonin banesat, ndanin rolet mes anëtarëve dhe përdornin çelësa të falsifikuar për të hyrë në shtëpi. Vetëm në muajin nëntor 2024, grupit i atribuohen të paktën 12 vjedhje, të zbuluara falë përgjimeve dhe monitorimit të automjeteve.
Pas arrestimit të dy anëtarëve në provincën Monza Brianza në dhjetor 2024, i treti qëndroi në arrati për 8 muaj, deri sa u kap në Spanjë dhe u ekstradua drejt Italisë.
Radar.al