Pas raportimeve nga mediat australiane për përfshirjen e saj dhe të bashkëshortit Elvis Pupa në një rast kultivimi kanabisi në Australi, Belina Pupa ka reaguar publikisht duke mohuar akuzat dhe sqaruar pozicionin e saj ligjor.
Në një postim në rrjetet sociale, influencerja shqiptare deklaron se ndodhet në gjendje të lirë dhe se aktiviteti i saj profesional vijon normalisht. Ajo thekson se e vetmja kufizim që i është vendosur për momentin lidhet me udhëtimet ndërkombëtare për arsye pune.
“Jam plotësisht e lirë. Kërkesa që është bërë nga avokatët e mi lidhet vetëm me udhëtimet ndërkombëtare, për të mundësuar angazhimet e mia në Shqipëri, SHBA dhe Australi,” shkruan ajo.
Pupa thotë se për shkak të një procesi ligjor në zhvillim nuk mund të japë më shumë detaje, por shpreh besim se gjithçka do të sqarohet drejt dhe në mënyrë transparente.
Në reagimin e saj, ajo kritikon mediat për spekulimet dhe i fton të ruajnë profesionalizmin në raportim, veçanërisht kur bëhet fjalë për figura publike.
“Sa për çështjen, ja lëmë kohës dhe drejtësisë të flasë e fundit,” përfundon Belina Pupa.
Postimi i plotë:
Të dashur miq, ndjekës dhe bashkëpunëtorë,
Dua t’ju falënderoj me zemër për të gjithë mesazhet, mbështetjen dhe dashamirësinë që më keni treguar këto ditë. E ndjej të nevojshme të ndaj me ju disa sqarime në lidhje me lajmet që kanë qarkulluar në media.
Aktualisht jam plotësisht e lirë dhe po vazhdoj aktivitetin tim profesional si zakonisht. Kërkesa që është bërë nga avokatët e mi lidhet vetëm me udhëtimet ndërkombëtare për arsye pune – një nevojë legjitime për të vijuar angazhimet e mia në Shqipëri, SHBA dhe Australi.
Për respekt të procesit ligjor që është ende në zhvillim, nuk mund të jap detaje të mëtejshme. Por jam e bindur se gjithçka do të sqarohet në mënyrë të drejtë dhe transparente.
Një apel për mediat: ju ftoj të ruani profesionalizmin dhe të mos i dorëzoheni spekulimeve. Raportimi korrekt dhe etik është më i nevojshëm se kurrë, veçanërisht kur bëhet fjalë për figura publike dhe çështje të ndjeshme. Nëse vendosni të citoni media të huaja, bëjeni saktë. Dhe nëse zgjidhni të punoni për klikime, të paktën mos dëmtoni të vërtetën.
Sa për çështjen, ja lëmë kohës dhe drejtësisë të flasë e fundit.
Me respekt dhe mirënjohje, Belina