Ministrat e Energjisë të Bashkimit Evropian miratuan sot zyrtarisht planin për ndalimin gradual të importeve të gazit rus, një hap vendimtar në strategjinë e BE-së për pavarësi energjetike dhe për t’i prerë Moskës një nga burimet kryesore të të ardhurave.
“Një Evropë e pavarur në energji është një Evropë më e fortë dhe më e sigurt,” deklaroi ministri danez i Energjisë, Lars Aagaard, i cili drejtoi bisedimet në Luksemburg. Ai pranoi se, megjithëse Europa ka ulur ndjeshëm varësinë nga gazi rus që prej nisjes së luftës në Ukrainë, “ende nuk kemi arritur në zero”.
Vendimi i ministrave hap rrugën për finalizimin e ligjit me Parlamentin Evropian, i cili tashmë e ka miratuar draftin paraprak. Sipas propozimit, të gjitha importet e gazit rus — si nëpërmjet tubacioneve, ashtu edhe LNG-së (gazit të lëngshëm) — do të ndalohen plotësisht jo më vonë se viti 2028.
“Ky është një moment historik për sigurinë energjetike të kontinentit,” shtoi Aagaard, duke theksuar mbështetjen e gjerë të ministrave për iniciativën.
Paralelisht, Brukseli po përgatit një paketë të re sanksionesh, që mund të përshpejtojë ndalimin e importeve të LNG-së ruse, përpara afatit zyrtar.
Sipas të dhënave të BE-së, në vitin 2024 Rusia furnizoi ende rreth 20% të gazit të importuar nga Evropa, kryesisht në formën e LNG-së. Vetëm në gjysmën e parë të vitit 2025, vlera e importeve nga Moska arriti në 4.5 miliardë euro.
Sanksionet kundër Rusisë mbeten të përkohshme dhe do të rishikohen pas përfundimit të luftës në Ukrainë, por ndalimi i gazit konsiderohet një masë afatgjatë dhe strategjike që synon ta shkëpusë Evropën përfundimisht nga varësia ndaj energjisë ruse.