Komisioni Europian po shqyrton mundësinë e vendosjes së një takse mbi ushqimet shumë të përpunuara që përmbajnë nivele të larta të yndyrës, sheqerit dhe kripës, sipas një projekt-dokumenti që pritet të prezantohet në mesin e dhjetorit. Qëllimi i kësaj mase është të stimulojë ushqyerjen më të shëndetshme dhe të ndikojë sjelljen e konsumatorëve pa shkaktuar pasoja financiare të mëdha.
Propozimi parashikon një “mikro-taksë në nivel të BE-së”, që mund të mbajë çmimet stabile dhe të motivojë prodhuesit të krijojnë produkte më të shëndetshme. Të ardhurat e grumbulluara nga taksa do të përdoren ekskluzivisht për programet promovuese të shëndetit në të gjithë Bashkimin Evropian.
Komisioni thekson se sëmundjet kardiovaskulare janë shkaku kryesor i vdekjeve në BE, me mbi 1.7 milion raste çdo vit dhe një kosto ekonomike mbi 280 miliardë euro (325 miliardë dollarë). Studimet tregojnë lidhjen mes konsumit të lartë të ushqimeve të përpunuara dhe rrezikut të obezitetit, diabetit dhe sëmundjeve metabolike.
Përveç taksave, plani i Komisionit parashikon gjithashtu modernizimin e legjislacionit për kontrollin e duhanit deri në vitin 2027 dhe futjen e një sistemi vlerësimi për ushqimet e përpunuara në të gjithë Evropën.
Qëllimi afatgjatë është ulja e vdekshmërisë nga sëmundjet kardiovaskulare me 20% deri në vitin 2035, përmes këtyre dhe iniciativave të tjera shëndetësore.