Bashkimi Evropian ka reaguar ashpër pas sulmit ajror të Izraelit në kryeqytetin e Katarit, Dohë, ku u goditën udhëheqës të Hamasit. Brukseli e ka cilësuar këtë akt si një shkelje të hapur të ligjit ndërkombëtar dhe të integritetit territorial të Katarit.
Në një deklaratë të bërë publike të martën në mbrëmje, BE paralajmëroi për pasoja të rënda nëse dhuna në rajon përshkallëzohet më tej.
“Shprehim solidaritet të plotë me autoritetet dhe popullin e Katarit, një partner strategjik i Bashkimit Evropian,” theksoi zëdhënësi i Kaja Kallas, përfaqësueses së lartë për politikën e jashtme të BE-së, në një reagim në rrjetin social X.
Ai shtoi se çdo hap që çon drejt zgjerimit të luftës në Gaza duhet shmangur me çdo kusht, pasi nuk i shërben interesit të askujt. “Ne do të vazhdojmë të mbështesim të gjitha përpjekjet drejt një armëpushimi në Gaza,” u shpreh zyrtari i BE-së.
Sulmi ka shkaktuar alarm ndërkombëtar, duke ngritur frikën se konflikti mund të hapë një front të ri në Lindjen e Mesme, në një kohë kur tensionet mbeten tejet të larta.