Nga 1 maji 2026 hyjnë në fuqi rregulla të reja të Bashkimit Europian për produktet kozmetike, me synimin për të rritur sigurinë e konsumatorëve dhe për të forcuar kontrollin mbi përbërësit potencialisht të dëmshëm.
Rregullorja e re, e miratuar më 12 janar 2026, vendos kufizime më të rrepta për substancat e klasifikuara si CMR (kancerogjene, mutagjene ose toksike për riprodhimin), duke prekur një gamë të gjerë produktesh si manikyrët, parfumet, make-up-i dhe produktet e higjienës orale.
Një nga ndryshimet kryesore lidhet me përdorimin e argjendit (CI 77820), i përdorur për efekte shkëlqyese dhe metalike. Sipas rregullave të reja, ky përbërës do të lejohet vetëm deri në 0.2% dhe vetëm në produkte të caktuara si buzëkuq, gloss dhe rimel për sytë.
Ndërkohë, përdorimi i tij do të ndalohet në manikyrë, xhel për thonj, produkte për rikonstruksionin e tyre, si dhe në sprej dhe produkte aerosol. Si pasojë, shumë produkte me efekt metalik apo glitter argjendi nuk do të jenë më në përputhje me standardet e reja dhe nuk do të lejohen në treg apo në përdorim profesional.
Industria e bukurisë në Europë pritet të përballet me një periudhë përshtatjeje, pasi prodhuesit dhe profesionistët do të duhet të reformulojnë produktet dhe të përshtatin praktikat e tyre me kërkesat e reja ligjore.
Këto masa janë pjesë e një qasjeje më të gjerë të BE-së për të forcuar mbrojtjen e shëndetit publik dhe për të ulur ekspozimin ndaj substancave të rrezikshme në përdorimin e përditshëm.