Bashkimi Evropian ka reaguar pas vendimit të Gjykata Supreme e SHBA-së që shpalli të paligjshme tarifat e vendosura nga Donald Trump, duke theksuar se po e analizon me kujdes situatën dhe pasojat e mundshme.
“Po e marrim parasysh vendimin dhe po e shqyrtojmë me kujdes”, deklaroi për Agence France-Presse zëdhënësi i Komisioni Evropian, Olof Gill, i cili shtoi se Brukseli pret sqarime nga qeveria amerikane mbi masat që synon të ndërmarrë pas këtij vendimi.
Ai nënvizoi se bizneset në të dyja anët e Atlantikut varen nga marrëdhënie tregtare të qëndrueshme dhe të parashikueshme, duke ritheksuar angazhimin për tarifa të ulëta dhe përpjekjet për reduktimin e tyre.
Komisioni Evropian ende nuk ka bërë të ditur se çfarë ndikimi do të ketë ky zhvillim mbi marrëveshjen tregtare të arritur verën e kaluar mes BE-së dhe SHBA-së, e cila uli në 15% tarifat amerikane për shumicën e produkteve evropiane.
Vendimi i Gjykatës Supreme mund të ndikojë në ritmin e zbatimit të kësaj marrëveshjeje. Ndërkohë, Komiteti i Tregtisë i Parlamenti Evropian pritet ta diskutojë çështjen të hënën dhe të votojë të martën.
Kreu i këtij komiteti, eurodeputeti gjerman Bernd Lange, ka njoftuar thirrjen e një takimi të jashtëzakonshëm të ekipit negociator dhe shërbimit ligjor të Parlamentit Evropian për të vlerësuar hapat e ardhshëm dhe implikimet e vendimit mbi kalendarin e planifikuar.
Sipas tij, duke qenë se një pjesë e tarifave hakmarrëse mbështeten në një kuadër ligjor tashmë të diskutueshëm, as pala amerikane dhe as ajo evropiane nuk mund të veprojnë sikur vendimi të mos kishte ndodhur.