Në fund të vitit 2024, 76% e stokut të kredisë bankare në Shqipëri ishte e mbuluar me kolateral, duke reflektuar një rritje të lehtë nga 75% në fund të vitit 2023. Pasuritë e paluajtshme mbeten forma mbizotëruese e garancisë, duke përbërë 61% të totalit të kredive të kolateralizuara dhe 46% të gjithë stokut të kredisë.
Kreditë me mbështetje mbi prona rezidenciale shënuan një rritje vjetore prej 9% gjatë 2024-s, duke e thelluar më tej ekspozimin e bankave ndaj sektorit të pasurive të paluajtshme.
Banka e Shqipërisë ka paralajmëruar për rreziqet që sjell kjo varësi në rritje ndaj tregut imobiliar, i cili është i ndjeshëm ndaj luhatjeve të çmimeve dhe cikleve ekonomike. Për të frenuar këto rreziqe, janë ndërmarrë masa të reja mbikëqyrëse dhe kufizime në raportin kredi-vlerë prone (LTV), që tani varion nga 70% deri në 85%, në varësi të valutës dhe qëllimit të pronës.
Gjithashtu, për herë të parë është zbatuar shtesa kundërciklike e kapitalit, e cila synon të përforcojë mbrojtjen e sistemit bankar ndaj rreziqeve të mundshme nga mbikreditimi. Kjo shtesë është vendosur në 0.25% në qershor 2024 dhe u rrit në 0.5% në dhjetor, me hyrje në fuqi përkatësisht në qershor dhe dhjetor 2025.