Një grup kriminal me origjinë shqiptare është dënuar me më shumë se 38 vite burg në Mbretërinë e Bashkuar, pasi u shpall fajtor për një seri vjedhjesh të organizuara ku u grabitën rreth 1 milion paund mallra dhe para.
Të dënuarit janë Kristian Gropcaj, George Lleshaj, Krisjian Dedndreaj, Sidorjan Lleshi dhe Jade Tubb, të cilët u paraqitën në Gjykatën e Kurorës në Chester.
Hetimet zbuluan se grupi ishte përgjegjës për të paktën 59 grabitje në zona të ndryshme të Britanisë, përfshirë Derbyshire, Cheshire, Nottinghamshire dhe Staffordshire. Në disa raste, ata përdornin shkallë për të hyrë në banesa nga dritaret e kateve të para dhe ballkonet.
Policia britanike tha se organizata kriminale kishte funksionuar në mënyrë të strukturuar, duke planifikuar vjedhjet dhe duke synuar shtëpi me sende me vlerë të lartë si bizhuteri, ora luksoze dhe çanta firmato.
Gjatë hetimeve, autoritetet përdorën ADN, analiza telefonike dhe kamera sigurie për të lidhur të dyshuarit me ngjarjet, ndërsa një pjesë e mallrave të vjedhura është rikuperuar.
Policia e zonës ka bërë të ditur se hetimet vijojnë për gjetjen e pronarëve të sendeve të sekuestruara gjatë operacionit.