Zëvendëskryeministrja dhe ministre e Infrastrukturës dhe Energjisë, Belinda Balluku, mori pjesë në takimin e 6-të të Partneritetit për Bashkëpunim Transatlantik në Energji (P-TEC) në Athinë, ku u diskutua rritja e bashkëpunimit mes SHBA, Bashkimit Europian dhe vendeve të Europës Qendrore dhe Jugore në fushën e energjetikës.
Balluku theksoi se Sekretari Amerikan i Energjisë, Chris Wright, adresoi një vizion për sigurinë energjetike dhe bashkëpunimin transatlantik, duke përfshirë minimizimin e ndikimit të gazit rus në Europë. Greqia njoftoi gjithashtu se në vitin 2024 u bë vend eksportues neto i energjisë për herë të parë.
Ministrja shqiptare njoftoi se Shqipëria synon deri në vitin 2030 të kthehet nga vend importues në eksportues neto, duke përfshirë projektet e rëndësishme të interkonjeksionit: korridori VIII energjetik dhe korridori Lindje-Perëndim, që lidh Rumaninë, Bullgarinë, Maqedoninë e Veriut, Shqipërinë dhe Italinë.
Balluku nënvizoi rëndësinë e linjës së interkonjeksionit nënujor drejt Italisë, e konsideruar një investim kyç për sigurinë energjetike të Europës Juglindore. Ajo theksoi gjithashtu rolin vendimtar të Departamentit Amerikan të Energjisë dhe të sekretarit amerikan të Punëve të Brendshme, Doug Burgum, për qëndrueshmërinë dhe pavarësinë energjetike të rajonit.