Avokati i Sali Berishës, Genc Gjokutaj, tha se SPAK po nxiton të dërgojë në gjyq çështjen ndaj ish-kryeministrit pasi ka frikë se mbaron afati i paraburgimit.
Pasi Berisha u mor sërish i pandehur, ai dhe dhëndri i tij Jamarbër Malltezi, bënë sërish kërkesë për shfuqizim të masës së sigurisë “arrest shtëpie”, por Gjykata e Posaçme këtë të premte e hodhi poshtë kërkesën e tyre.
Avokati i Berishës tha se kryetari i Partisë Demokratike nuk ka rrezik të prishë provat. “Provën e provës që ai nuk prish provat janë 3 muajt që ai ka qenë në gjendje të lirë pas tetorit. Asnjë dëshmitar nuk është intimiduar, asnjë zyrë nuk është marrë në telefon dhe asnjë dokument nuk është penguar për t’u administruar”, tha ai.
I pyetur nëse ka llogaritur kur përfundon afati i masës së sigurisë, Gjokutaj tha: “Matematika, kur mbarojnë, nuk është sekret hetimor, por diskrecion i mbrojtjes. Afatet e paraburgimit me afatet e hetimit janë dy gjëra të ndryshme. Këta nxitojnë sepse i detyron masa e sigurimit, e kufizimit të lirisë, se kanë frikë se u skadon, shuhet masa për shkak të kalimit të afatit tërësor. Dhe nxitojnë. Në rastin e Berishës këta besoj do të nxitojnë. Në raste të tjera, si rasti i Dakos, këta nuk nxituan dhe u shkau nga dora”.