Katër persona janë dërguar në spital me lëndime të lehta pas një aksidenti ajror të ndodhur të dielën në mbrëmje në një lagje të Pembroke Pines, Florida bënë të ditur autoritetet lokale.
Policia e Pembroke Pines njoftoi në rrjetet sociale se oficerët po asistojnë në vendin e ngjarjes, ku një avion i vogël u përplas me një pemë në zonën pranë Southwest 14th Street dhe 68th Boulevard, në perëndim të aeroportit North Perry.
Sipas përfaqësuesve të aeroportit North Perry, avioni ishte “i bazuar” aty, ndërsa Bordi Kombëtar i Sigurisë së Transportit (NTSB) deklaroi se bëhej fjalë për një Cessna T337G, i cili ishte në fazën e uljes kur “u rrëzua për arsye ende të panjohura”, rreth një milje larg pistës. Të dhënat nga FlightAware tregojnë se avioni po vinte nga Turks and Caicos.
Policia konfirmoi se piloti dhe tre pasagjerët kanë dalë të sigurt nga avioni. Kjo falë ndërhyrjes së menjëhershme të banorëve që bënë gjithçka për të nxjerrë personat që ndodheshin në avionin e përfshirë nga flakët.
Shërbimi i Zjarrfikësve të Pembroke Pines i tha CBS News Miami se të katër personat u dërguan në spitalin Memorial. Njëri prej tyre u klasifikua si pacient në gjendje Trauma Niveli 1, ndërsa tre të tjerët si Trauma Niveli 2. Megjithatë, më vonë policia konfirmoi se të katër kanë pësuar vetëm lëndime të lehta.
NTSB ka nisur një hetim për aksidentin.
Banorët e zonës dolën menjëherë për të parë çfarë kishte ndodhur. Dëshmitarët për CBS News Miami treguan çfarë kishin dëgjuar dhe parë:
“Dëgjuam një bum të madh dhe më pas një ‘shhhhh’… E kuptuam menjëherë që ishte një avion,” tha Michael Pfefferkorn.
Një tjetër banor tha se zhurma “ishte si të ishte përmbysur një kamion i madh”.
“Thjesht pamë tymin që ngrihej në ajër,” shtoi Tanielle Dacosta.
Disa fqinjë u hodhën menjëherë në veprim për të ndihmuar.
“Një fqinj erdhi me sëpatë dhe theu dritaret. Nxorëm babanë i pari, më pas dy vajzat nxorën kokën nga sediljet, por duhej të thyenim pjesën e poshtme të kabinës sepse nëna ishte poshtë, e bllokuar,” tregoi Eddy Crispin. “Një fqinj tjetër erdhi me një zjarrfikëse dore, ndërsa ai ku ra avioni kishte një zorrë uji dhe po ftohte avionin.”
Kryetari i Bashkisë Pembroke Pines, Angelo Castillo, doli në vendngjarje mbrëmjen e së dielës dhe bëri thirrje për veprim urgjent nga autoritetet.
“Gjatë pesë viteve të fundit kemi pasur mbi 35 aksidente në këtë zonë. Durimi ynë ka mbaruar,” tha ai. “Kjo komunitet kërkon të ndihet i sigurt. I bëj thirrje Komisionit të Broward-it të nisë një hetim të plotë mbi sigurinë në aeroportin North Perry.”