Policia e Tiranës ka finalizuar operacionin e koduar “Medikamentet”, duke arrestuar 35-vjeçarin Albi Hadroviq, administrator i farmacisë “TATA”, për tregtim të medikamenteve të dyshuara si të kontrabanduara.
Gjatë kontrollit të kryer në farmacinë në bulevardin “Zogu i Parë”, u sekuestruan medikamente me vlerë rreth 35 mijë euro. Në lidhje me rastin, është proceduar penalisht edhe një punonjëse e farmacisë, shtetasja A.M., 33 vjeçe, e punësuar në mënyrë të paligjshme.
Materialet procedurale janë dorëzuar në Prokurori për veprime të mëtejshme, ndërsa policia vijon punën për parandalimin dhe goditjen e veprimtarive kriminale në fushën e kontrabandës së mallrave.