Çmimi i arit po shënon nivele historike, duke tejkaluar për herë të parë edhe performancën e kriptomonedhës Bitcoin në tregjet globale. Të martën, bursa ndërkombëtare regjistroi një rekord të ri prej mbi 4,000 dollarësh për ons (rreth 29 gramë), që i korrespondon më shumë se 125 dollarëve për gramë.
Ky shpërthim në vlerë vjen në një periudhë pasigurie ekonomike dhe gjeopolitike, ku investitorët po i drejtohen metaleve të çmuara si strehë e sigurt. Vetëm këtë vit, ari është rritur me mbi 50%, i nxitur nga një kombinim faktorësh që variojnë nga tensionet globale, ndryshimet në politikat tregtare të SHBA-së, e deri tek blerjet masive nga bankat qendrore.
Sipas analistëve, politika e re tregtare e Presidentit amerikan Donald Trump dhe ndërhyrjet e tij në sistemin financiar global kanë krijuar një klimë pasigurie që po favorizon arin si aset të qëndrueshëm.
Një tjetër faktor vendimtar janë hyrjet rekord në fondet ETF të mbështetura nga ari, si dhe kërkesa në rritje nga investitorët privatë. Goldman Sachs, një nga bankat më të mëdha në botë, vlerëson se kjo rritje nuk ka arritur ende kulmin.
Në një raport të fundit, banka ka parashikuar që çmimi i arit mund të arrijë 4,300 dollarë për ons deri në fund të vitit 2026, ndërsa në një skenar më optimist — nëse vetëm 1% e tregut privat të thesarit amerikan zhvendoset drejt arit — çmimi mund t’i afrohet 5,000 dollarëve për ons.
Ekspertët theksojnë se aftësia e investitorëve të vegjël për të diversifikuar portofolin e tyre në mënyrë të gjerë është bërë tashmë një faktor kyç në këtë trajektore të re të çmimeve.