MILANO– Policia italiane ka vënë në pranga tre shqiptarë përkatësisht të moshës 29, 40 dhe 51 vjeç pasi u gjetën në një apartament në Lentate të cilin e kishin kthyer në laborator për prodhimin dhe përpunimin e kokainës.
Pas kontrollove u gjetën dy pistoleta gjysmë automatike, njëra e paligjshme me numrin serial të gërvishtur dhe tjetra e vjedhur.
Mësohet se para katër ditësh është arrestuar 29-vjeçari, i cili po lëviste me makinë. Të riut iu gjetën 500 euro dhe dy telefona celular, njëri prej të cilëve me një sistem mesazhesh të koduara.
Kontrollet vazhduan edhe në apartament ku u gjetën dy shqiptarët e tjerë, 40 dhe 51 vjeç.
Në bodrum, policia gjeti një linjë prodhimi dhe përpunimi kokaine, midis banjës, dhomës nën shkallët dhe garazhit, u gjetën disa presa hidraulike dhe sende të tjera që shërbenin për përpunimin e kokainës.
Në strukturën e divanit të dhomës së ndenjes u gjetën dy pistoleta gjysmë automatike me karikatorë përkatës të pajisur me fishekë. Tre shqiptarët janë shoqëruar në burgun e Monzës dhe po kryhen veprimet e mëtejshme.