Ekspertët kryesorë të shëndetësisë në Shtetet e Bashkuara kanë paralajmëruar për rrezikun në rritje të një pandemie të re, ndërsa gripi i shpendëve (H5N1) po përhapet me ritme alarmante në fermat e vendit.
Që nga fillimi i shpërthimit në vitin 2022, mbi 168 milionë shpendë janë asgjësuar, ndërsa së fundmi virusi ka kaluar edhe te gjitarët – përfshirë gati 1,000 tufa lopësh – dhe ka shkaktuar më shumë se 70 infeksione njerëzore, përfshirë një vdekje të konfirmuar.
Sipas Rrjetit Global të Viruseve (GVN), rreziku është veçanërisht i madh në zonat bujqësore, ku masat mbrojtëse janë të dobëta dhe kontaktet e drejtpërdrejta me kafshët janë të shpeshta. Edhe pse nuk është vërejtur ende transmetim nga njeriu te njeriu, mutacionet e mundshme të virusit mund ta kthejnë H5N1 në një kërcënim real për shëndetin global.
“Ne duhet të jemi gati,” – paralajmëron Dr. Peter Palese, virolog i njohur dhe drejtues në GVN. Ai bën thirrje për masa urgjente biosigurie, kontroll më të rreptë në fermat e shpendëve dhe edukim të gjerë të publikut për të shmangur një skenar që mund të ngjajë me fillimet kaotike të pandemisë COVID-19.