Gjykata e Posaçme kundër Korrupsionit dhe Krimit të Organizuar (GJKKO) ka shpallur të pafajshme deputeten demokrate Albana Vokshi, duke hedhur poshtë padinë për shpifje të bërë nga sipërmarrësja Vilma Nushi dhe kompania e saj “3P LIFE LOGISTIC”.
Padia lidhej me deklaratat publike të Vokshit rreth koncesioneve në shëndetësi, në veçanti aferës së shumëpërfolur të “check-up”-it. Në vendimin e saj të datës 21 korrik 2025, gjykata, me trup gjykues të kryesuar nga gjyqtarja Etleva Deda, arriti në përfundimin se deklaratat e Vokshit nuk përbëjnë vepër penale sipas nenit 120 të Kodit Penal (“Shpifja”).
Për rrjedhojë, gjykata vendosi:
Deklarimin e pafajshme të Albana Vokshit për akuzën e shpifjes.
Ngarkimin e shpenzimeve gjyqësore viktimave akuzuese, Vilma Nushi dhe shoqërisë “3P LIFE LOGISTIC”.
E drejta për apelim mbetet e hapur në Gjykatën e Posaçme të Apelit për Korrupsionin dhe Krimin e Organizuar.
Ky vendim konsiderohet një precedent i rëndësishëm për lirinë e shprehjes së deputetëve në ushtrimin e funksionit të tyre për mbikëqyrjen e qeverisë dhe menaxhimit të fondeve publike.
Vendimi:
NJOFTIM PËR MEDIAT
1. Viktimat akuzuese Vilma Nushi dhe shoqëria “3P LIFE LOGISTIC”, me administrator shtetasin Altin FANI me datë 16.01.2025 kanë paraqitur pranë Gjykatës kërkesën për gjykimin e ҫështjes penale me të akuzuar shtetasen Albana Vokshi, e
akuzuar për kryerjen e veprës penale “Shpifja”, e kryer botërisht, parashikuara nga neni 120 i Kodit Penal.
2. Në përfundim të gjykimit, Gjykata e Posaçme e Shkallës së Parë për Korrupsionin dhe Krimin e Organizuar me trup gjykues të përbërë nga gjyqtarja Etleva Deda, me vendimin Nr. 51, datë 21.07.2025 vendosi:
1. Deklarimin e pafajshme të të akuzuarës Albana Vokshi, për kryerjen e veprës penale “Shpifja”, e kryer botërisht, e parashikuar nga neni 120 i Kodit Penal, në dëm të viktimave akuzuese Vilma Nushi dhe shoqëria “3P LIFE LOGISTIC”,
pasi fakti nuk përbën vepër penale.
2. Shpenzimet gjyqësore i ngarkohen viktimave akuzuese, Vilma Nushi dhe shoqërisë “3P LIFE LOGISTIC”.
3. Kundër këtij vendimi mund të bëhet ankim brenda afatit ligjor, në Gjykatën e Posaçme të Apelit për Korrupsionin dhe Krimin e Organizuar.