Shqipëria mund të zbresë sonte në fushë pa një nga armët e saj më të rëndësishme në repartin ofensiv. Myrto Uzuni ka shfaqur probleme shëndetësore vetëm pak orë para miqësores ndaj Izraelit dhe aktivizimi i tij mbetet në dyshim.
Burime pranë ekipit bëjnë me dije se sulmuesi kuqezi është zgjuar me temperaturë si pasojë e një viroze, çka ka ndikuar në planet e stafit teknik. Sipas të njëjtave burime, 30-vjeçari me shumë gjasa nuk do ta nisë ndeshjen si titullar, ndërsa ende nuk ka një vendim përfundimtar nëse do të jetë i gatshëm të aktivizohet nga stoli.
Mungesa e mundshme e Uzunit përbën një shqetësim për trajnerin Rolando Maran, i cili synon të testojë dhe konsolidojë skemat ofensive në prag të angazhimeve të ardhshme të Kombëtares.
Ironikisht, lajmi vjen pikërisht përpara një sfide ndaj kundërshtarit ndaj të cilit Uzuni ka lënë gjurmë me fanellën kuqezi. Sulmuesi ka shënuar dy gola në dy përballje ndaj Izraelit, duke rezultuar një nga protagonistët kryesorë në duelet mes dy ekipeve.
Në sfidën e Nations League më 10 qershor 2022, ai realizoi golin e parë në fitoren 2-1 të Shqipërisë në Tiranë. Ndërsa më 24 shtator 2022, Uzuni gjeti sërish rrugën e rrjetës në humbjen 2-1 në transfertë ndaj Izraelit.
Mbetet për t’u parë nëse sulmuesi do të rikuperohet në kohë për të dhënë kontributin e tij, apo Shqipëria do të duhet të përballet me Izraelin pa një prej futbollistëve më vendimtarë në repartin e avancuar.
Bilanci i Uzunit kundër Izraelit:
- Ndeshje të luajtura: 2
- Gola të shënuar: 2 (100% efikasitet)
Përballjet historike:
- 10 Qershor 2022 (Nations League): Shqipëri 2–1 Izrael | Uzuni 17′
- 24 Shtator 2022 (Nations League): Izrael 2–1 Shqipëri | Uzuni 88′