Një incident sigurie tronditi autoritetet irlandeze ditën e hënë, kur një anije e Marinës Luftarake identifikoi deri në pesë dronë të panjohur që po monitoronin avionin presidencial që transportonte presidentin ukrainas, Volodymyr Zelensky, drejt Dublinit.
Sipas mediave vendase, dronët “të tipit ushtarak” shkelën zonën e ndaluar të fluturimit dhe u afruan në trajektoren e avionit, duke shkaktuar një alarm sigurie. Megjithatë, avioni me Zelenskyn u ul pa probleme, ndërsa delegacioni ukrainas qëndroi në Dublin për një vizitë dyditore për të siguruar mbështetje europiane përballë agresionit rus.
Incidenti vjen në një kohë kur fluturime të dronëve të panjohur kanë shkaktuar ndërprerje të trafikut ajror në disa vende evropiane. Presidentja e Komisionit Europian, Ursula von der Leyen, i ka cilësuar këto incidente si pjesë të një “lufte hibride” që përfshin përdorimin e teknologjive të sofistikuara për presion dhe destabilizim.