Dy vatra zjarri kanë përfshirë pasditen e sotme fshatin Borizanë, pranë fabrikës së çimentos dhe guroreve në Krujë. Autoritetet dyshojnë se zjarret janë të qëllimshme, ndoshta për të hapur terren për guroret ekzistuese ose të reja.
Për shuarjen e flakëve është angazhuar reparti zjarrfikës i rrethit, me të gjitha mjetet dhe personelin e disponueshëm. Era e fortë ka përhapur zjarrin, duke djegur disa hektarë pishash të reja dhe duke e bërë situatën edhe më të rrezikshme.
Alarmi shtohet edhe për faktin se rreth 1 km nga vatra e zjarrit ndodhet një depo dinamiti, nga e cila furnizohen guroret e zonës, gjë që rrit rrezikun për një tragjedi të mundshme.