Franca u vu në gjendje alarmi të enjten mbrëma, kur pesë dronë u identifikuan duke fluturuar mbi bazën ultrasensitive të nëndetëseve bërthamore në Île Longue, pranë Brestit. Ngjarja ndodhi rreth orës 19:30, duke detyruar ushtrinë të nisë menjëherë një operacion të specializuar kundër-dronësh. Trupat e këmbësorisë detare qëlluan disa raketa anti-dron për të neutralizuar pajisjet e paidentifikuara.
Prefektura Detare e Atlantikut dhe prokuroria nuk kanë komentuar ende incidentin.
Rajoni ka regjistruar edhe më parë fluturime të dyshimta me dron; vetëm disa javë më parë një tjetër dron u raportua mbi gadishullin Crozon. Baza Île Longue, e mbrojtur nga rreth 120 xhandarë detarë, është qendra e mburojës bërthamore franceze, ku mirëmbahen katër nëndetëse strategjike me raketa balistike, të paktën njëra prej të cilave patrullon vazhdimisht në det.
Shumë vende të Evropës Veriore raportojnë rritje të fluturimeve të tilla në infrastrukturat kritike, ndërsa dyshimet po orientohen drejt operacioneve hibride të lidhura me Moskën.