Të paktën 21 persona kanë humbur jetën si pasojë e tornadove shkatërrimtare që goditën dy shtete në Shtetet e Bashkuara, njoftuan zyrtarët lokalë të shtunën.
Guvernatori i Kentakit, Andy Beshear, konfirmoi vdekjen e 14 personave në këtë shtet, ndërsa në Missouri janë raportuar 7 viktima. Në qytetin e St. Louis, autoritetet thanë se pesë persona kanë humbur jetën dhe më shumë se 5,000 shtëpi janë dëmtuar nga stuhitë.
Sistemi i fuqishëm i motit ka prekur gjithashtu edhe Wisconsin-in, duke shkaktuar ndërprerje të mëdha të energjisë elektrike, me qindra mijëra banorë të mbetur pa furnizim.
Paralajmërime për shtete të tjera
Shërbimi Kombëtar i Motit ka paralajmëruar për një valë tjetër stuhish të rrezikshme që pritet të godasë të shtunën Teksasin, Kansasin dhe Oklahomën.
“Stuhi të fuqishme me breshër të madh, erëra të forta dhe tornado të mundshme priten në të gjithë Rrafshnaltat Jugore,” thuhet në njoftim.
Tornadot pritet të përparojnë më tej drejt veriut dhe lindjes, duke përfshirë shtetet e Illinoisit, New Jersey-t dhe pjesë të bregut lindor të SHBA-së.
Autoritetet lokale dhe federale vijojnë përpjekjet për evakuimin e banorëve dhe minimizimin e dëmeve, ndërsa paralajmërojnë qytetarët të qëndrojnë të përgatitur për përkeqësimin e mëtejshëm të kushteve të motit.
Major damage along Hwy 27 and Parkers Mill Road in Somerset, KY. #kywx pic.twitter.com/i959oW4r1c
— Random Hero WX (@RandomHeroWX) May 17, 2025