Autoritetet rumune kanë urdhëruar mbylljen e shkollave në kryeqytet, jug dhe juglindje të vendit për ditën e nesërme, të mërkurën, për shkak të reshjeve të rrëmbyeshme që priten nga sonte.
Sipas Ministrisë së Mjedisit, pritshmëria e reshjeve është 80-100 litra për metër katror, ndërsa në zona të izoluara, sasia mund të arrijë deri në 120-140 l/m². Qytetarët janë këshilluar të shmangin udhëtimet gjatë periudhës së alarmit.
Kryetarët e disa bashkive me lartësi të ulët kanë filluar të përgatitin thasë me rërë për të parandaluar përmbytjet, ndërsa kryebashkiaku i përkohshëm i Bukureshtit, Stelian Bujduveanu, u shpreh se prioritet është siguria e banorëve dhe shmangia e panikut.
Rumania është goditur këtë verë nga përmbytje që kanë shkaktuar tre viktima në verilindje të vendit. Presidenti Nikos Dan theksoi rëndësinë e “investimeve të qëndrueshme për parandalimin dhe mbrojtjen nga rreziqet klimatike”.
Ekspertët paralajmërojnë se reshjet ekstreme po shtohen për shkak të ngrohjes globale. Javën e kaluar, katër persona humbën jetën në Bullgari nga shirat e rrëmbyeshëm që goditën bregdetin e Detit të Zi.