Behar Kamberi, mjek psikiatër nga Kosova, është liruar nga masa e ndalimit pas një vendimi të marrë nga Prokuroria e Tiranës, e cila ka vlerësuar se komunikimet e tij me moderatoren sportive Albano Bejko nuk përmbanin elementë të veprës penale të përndjekjes.
Kamberi ishte arrestuar disa ditë më parë nga Policia e Tiranës, pas një kallëzimi të paraqitur nga Bejko, e cila pretendonte se ishte përndjekur dhe shqetësuar nga mjeku. Çështja ishte referuar nga Komisariati Nr. 2, së bashku me provat e mbledhura gjatë hetimit paraprak, përfshirë deklaratën e kallëzueses dhe këqyrjen e mesazheve të dërguara mes dy palëve.
Sipas burimeve zyrtare, në qendër të hetimeve ishin disa mesazhe që Kamberi i kishte dërguar moderatores, ku ai shprehte interes të hapur romantik. Mes tyre përfshiheshin edhe fraza si:
“Të dua… dëshiroj të martohem me ty”
“Jeni shumë e bukur, dua t’ju takoj se kam ardhur nga Kosova vetëm për ju.”
Megjithatë, pas analizimit të përmbajtjes së komunikimeve, prokuroria ka arritur në përfundimin se mesazhet nuk kishin karakter kërcënues apo intimidues dhe nuk cenonin në mënyrë të drejtpërdrejtë sigurinë apo jetën private të kallëzueses.
Në vendimin e saj, Prokuroria i cilëson këto mesazhe si shprehje të një ndjenje sentimentale, të cilat, në mungesë të kërcënimeve apo ndjekjes fizike, nuk përbëjnë elementë të veprës penale të përndjekjes, sipas nenit përkatës të Kodit Penal.
Bazuar në këtë vlerësim, organi i akuzës ka vendosur heqjen e masës së paraburgimit dhe ka urdhëruar lirimin e menjëhershëm të Behar Kamberit nga qelia.