Aktori i njohur turk Can Yaman, i famshëm edhe në Itali për rolet e tij kryesore në serialet televizive të njohura si Sandokan dhe Viola come il mare, është arrestuar mbrëmjen e kaluar në Stamboll gjatë një operacioni policor kundër drogës, sipas raportimeve të mediave turke.
Operacioni përfshiu kontrolle në 9 lokale nate të ndryshme në metropolin e Bosforit, ku autoritetet gjetën lëndë narkotike dhe arrestuan shtatë persona, përfshirë aktoren Selen Gorguzel, si dhe pronarë, menaxherë dhe influencerë të lidhur me klubet e natës.
Yaman dhe të tjerët u dërguan në Institutin e Mjekësisë Ligjore, ku do t’u bëhen analiza të gjakut për të përcaktuar nëse dhe çfarë substance kanë konsumuar. Hetimi përfshin akuza të ndryshme, përfshirë “posedim droge për përdorim personal”, “lehtësim të përdorimit të drogës” dhe akuza që lidhen me prostitucionin apo lehtësimin e praktikave të tilla.
Sipas mediave turke, nuk është lëshuar një mandat arresti konkret vetëm për Yamanin në kuadër të hetimit – policia e ndaloi atë pasi gjatë një persekutimi në një nga klubet në të cilin ndodhej iu gjetën substanca narkotike në trup.
Operacioni antidrogë është pjesë e një hetimi më të gjerë që ka përfshirë gjatë javëve të fundit dhjetëra personazhe të njohur, përfshirë figura të argëtimit dhe gazetarë, në lidhje me përdorimin dhe shpërndarjen e drogave në Stamboll.
Can Yaman, i lindur në Stamboll në vitin 1989, ka një famë të gjerë ndërkombëtare për rolet e tij në prurjet dramatike turke të eksportuara në Itali dhe vende të tjera, dhe arrestimi i tij ka shkaktuar jehonë të madhe mediatike.