Një kamion dyshohet se është bërë shkak i një aksidenti të rëndë në Prishtinë, me disa të plagosur. Mjeti mësohet se ka dalë nga rruga në sensin e kundërt duke goditur disa automjete.
Si pasojë e aksidentit janë lënduar 11 persona. Këtë e ka konfirmuar Flora Ahmeti, zëdhënëse e Policisë për rajonin e Prishtinës.
“Sot rreth orës 14:30 kemi pranuar informatën se në Veternik ka ndodhë një aksident trafiku. Në këtë aksident kanë qenë të përfshirë një kamion dhe 11 automjete. Bazuar në të dhënat e deritanishme, si pasojë e aksidentit lëndime trupore kanë pësuar 11 persona. Me rastin po merret hetuesia nga njësiti i trafikut rrugor”, ka deklaruar Ahmeti.
Policia po heton për zbardhjen e plotë të shkaqeve të aksidentit.
