Individët që kanë pasur pagë bruto mbi 1.2 mln lekë në vitin 2024, duhet të dorëzojnë Deklaratën Individuale të të Ardhurave Personale. Nëse nuk e kanë plotësuar ende në faqen online të drejtorisë së tatimeve, qytetarët kanë afat deri në fund të muajit mars.
Procesi i deklarimit të të ardhurave, këtë vit ka pasur disa ndryshime, të njoftuara më herët edhe nga administrata tatimore, pasi pragu më herët ka qenë 2 mln lekë të ardhura në vit.
Tatimet thonë se janë 144 mijë individë, që duhet të plotësojnë formularin, ndërsa më shumë se gjysma e tyre e kanë bërë deri tani.
Ndërkohë, për ata që nuk e dorëzojnë, ka një penalitet me vlerë 3 mijë lekë, të cilit i bashkëngjitet edhe interesi dhe kamatëvonesa.
Arsyet pse bëhet kjo deklaratë, për Administratën Tatimore lidhen me kontrollet për evazion fiskal, ndërsa deklarimi duhet të bëhet edhe nga të gjithë të dypunësuarit, pavarësisht nivelit të pagave.