Administrata e presidentit amerikan Donald Trump pritet të bëjë një njoftim të bujshëm mbi lidhjen mes përdorimit të Tylenol (paracetamol/acetaminofen) gjatë shtatzënisë dhe rrezikut të shtuar për zhvillimin e autizmit tek fëmijët, raportoi Washington Post.
Sipas burimeve të gazetës, paralelisht do të shpallet edhe një iniciativë për të hetuar përdorimin e ilaçit Leucovorin si trajtim potencial për autizmin. Disa studime klinike të hershme kanë treguar se ky medikament mund të përmirësojë aftësitë e komunikimit tek fëmijët me autizëm, por shkencëtarët theksojnë se kërkimet janë ende në fazë të kufizuar.
Në një aktivitet përkujtimor, Trump e quajti këtë zhvillim “një nga gjërat më të rëndësishme” që do të ndërmarrë administrata e tij, duke shtuar: “Mendoj se kemi gjetur përgjigjen për autizmin.”
Megjithatë, ekspertët kujtojnë se sipas udhëzimeve aktuale mjekësore, përdorimi i paracetamolit gjatë shtatzënisë konsiderohet i sigurt kur bëhet në mënyrë të kufizuar dhe me doza të rekomanduara. Shumica e shkencëtarëve theksojnë se shkaku i autizmit mbetet i paqartë, ndërsa gjenetika dhe faktorët mjedisorë shihen si elementët më të rëndësishëm.