Këngëtarja britanike me famë botërore, Adele, do të bëjë debutimin e saj si aktore në filmin e ardhshëm të Tom Ford, “Cry to Heaven”, raportoi BBC.
Në këtë projekt kinematografik, Adele do të luajë përkrah disa prej emrave më të njohur të Hollivudit, përfshirë Nicholas Hoult, Aaron Taylor-Johnson, Colin Firth, Paul Bettany dhe Owen Cooper, yllin e filmit “Adolescence”.
Filmi është një përshtatje e romanit të vitit 1982 të Anne Rice, i cili zhvillohet në shekullin XVIII dhe trajton historinë dramatike të djemve të kastruar për të ruajtur zërat e tyre të lartë – një praktikë e njohur në botën e operës së asaj kohe.
Tom Ford, ish-drejtor kreativ i “Gucci” dhe “Yves Saint Laurent”, do të drejtojë, shkruajë dhe prodhojë filmin. Edhe pse roli i saktë i Adele-s nuk është zbuluar ende, burime nga produksioni thonë se ajo do të ketë një rol qendror në zhvillimin e historisë.
Romani mbi të cilin bazohet filmi rrëfen jetën e dy këngëtarëve të kastruar që arrijnë famë në Venecia, por jetët e tyre ndërlidhen në një histori pasioni, hakmarrjeje dhe arti.
Në kastin e gjerë do të jenë gjithashtu edhe Ciarán Hinds, George MacKay, Mark Strong, Hunter Schafer dhe Thandiwe Newton.
Për Adele, kjo shënon një kthesë të re në karrierë. Pas suksesit të jashtëzakonshëm të albumit të saj të fundit, katër vite më parë, dhe mbylljes së rezidencës së saj në Las Vegas vitin e kaluar, këngëtarja deklaroi se do të marrë një “pushim të gjatë” nga muzika – me sa duket për t’u përqendruar në aktrim.
Nga ana tjetër, Tom Ford, i cili shiti shtëpinë e tij të modës “Tom Ford” kompanisë Estee Lauder për 2.8 miliardë dollarë në vitin 2022, ka njoftuar se do t’i përkushtohet plotësisht kinemasë. Ai ka regjistruar më parë dy suksese të mëdha: “A Single Man” (2009) me Colin Firth dhe Nicholas Hoult, si dhe “Nocturnal Animals” (2016), i cili mori dy nominime për çmimet “BAFTA”.
“Cry to Heaven” pritet të nisë xhirimet në fillim të vitit të ardhshëm dhe është konsideruar tashmë si një nga projektet më ambicioze të Tom Ford – dhe debutimi më i shumëpritur në ekran i Adele-s.