Këtë të martë, disa familjarë që kanë humbur të afërmit e tyre që ishin të prekur me kancer, ishin në Prokurorinë e Posaçme, për të dhënë dëshmitë e tyre për pretendime për korrupsion dhe neglizhencë nga mjekët në Spitalin Onkologjik.
Gazetari i News24 Osman Stafa, i cili ishte së bashku me dëshmitarët në Prokurorinë e Posaçme, zbuloi pretendimet e familjarëve përpara hetuesve.
“Çfarë kemi sjellë sot? Dëshmi të atyre personave që janë dëmtuar. Po ka korrupsion, u kanë marrë lekë të sëmurëve me kancer. Nuk futen të gjithë mjekët këtu, se s’kam prova, por emrat e përmendur nga dëshmitarët sot s’mund t’i them. U kanë marrë lekë, sa herë që bënin kimioterapi”, theksoi gazetari.
Stafa u bëri apel të gjithëve që kanë një histori korrupsioni apo neglizhenece në Spitalin Onkologjik t’i denoncojnë këto në SPAK.
“Do i lutesha kujtdo që ka histori korrupsioni, apo neglizhence në Spitalin Onkologjk, të flasë. Të vijë në SPAK dhe t’I denoncojë. Po ashtu ata që kanë shkuar në Onkologjik dhe kanë përfunduar në spitalet private, të flasin”, tha Stafa
Gazetari Osman Stafa, ka dorëzuar në SPAK komunikimet e 5 viteve të fundit të mjekëve të Onkologjikut, nga ku pretendon se gjatë kësaj kohe pacientët me kancer janë lënë pa ilaçet kimio.