SHBA– Një nismë e veçantë nga Iva, një studente shqiptare që po përfundon studimet në programin e Dental Hygiene pranë New York City College of Technology në Brooklyn, po tërheq vëmendjen për humanizmin dhe përkushtimin ndaj komunitetit. Në semestrin e saj të fundit, Iva ka vendosur të ofrojë kontrolle dentare falas për të moshuarit mbi moshën 65 vjeç, duke e kthyer praktikën e saj klinike në një mundësi për të kontribuar në përmirësimin e shëndetit oral të kësaj grupmoshe.
Shërbimet që ofrohen përfshijnë kontroll dentar të plotë, pastrim profesional të dhëmbëve, radiografi, kontroll për kancer oral dhe aplikim të fluorit. Ajo çka e bën këtë nismë edhe më të veçantë është fakti që shërbimet janë krejtësisht falas dhe nuk kërkohet siguracion, duke e bërë kështu të aksesueshme për çdo të moshuar që ka nevojë për këto shërbime.
Takimet zhvillohen në adresën 285 Jay St, Brooklyn, NY 11201, çdo të hënë dhe të martë në orën 5:30 pasdite si dhe të shtunave në orën 8:30 të mëngjesit. Për të përfituar nga kjo mundësi, të interesuarit mund të kontaktojnë Ivën në numrin e telefonit (732) 518-8905.
Kjo nismë është një shembull frymëzues i përkushtimit dhe solidaritetit, duke treguar njëherazi se si shqiptarët në diasporë jo vetëm që realizojnë ëndrrat e tyre profesionale, por edhe japin një kontribut të vyer për komunitetin ku jetojnë. Iva mirëpret me dashamirësi çdo pacient që ka nevojë për kujdes dentar, duke e kthyer këtë eksperiencë në një ndihmë të vlefshme për shëndetin dhe mirëqenien e të moshuarve./Radar.al