Një ngjarje e pazakontë ka ndodhur së fundmi në Filipine ku 3 persona kanë ndërruar jetë dhe të paktën 32 persona po marrin kujdes spitalor pas konsumit të një gatimi me breshkë deti.
Burimet bëjnë me dije se viktimat, shumica nga komuniteti indigjen Teduray, filluan të shfaqin simptoma të tilla si diarre, të vjella dhe spazma abdominale pasi konsumuan pjatën e lartpërmendur javën e kaluar në një qytet bregdetar në Provincën Maguindanao del Norte.
Ndonëse gjuetia dhe konsumimi i breshkave deti është i paligjshëm sipas ligjeve të mbrojtjes së mjedisit në Filipine, ato bëjnë pjesë në gatimet tradicionale të zonës. Datu Mohamad Sinsuat Jr, një këshilltar lokal, u shpreh se urdhëroi zyrtarët lokalë të zbatojnë rreptësisht ndalimin e gjuetisë së breshkave deti në rajon, duke shprehur me bindje se ky incident helmimi me ushqim nuk do të ndodhë më kurrë.
Shumica e specieve të breshkave deti janë të klasifikuara si të rrezikuara dhe është e paligjshme në Filipine të mblidhen, dëmtohen ose vriten ato.