FBI ka informuar një nga avokatët kryesorë të presidentit të sapozgjedhur Donald Trump se telefoni i tij celular është përgjuar nga hakerë kinezë, i thanë CNN tre burime të njohura me këtë çështje., raporton Radar.al.
Lajmi vjen pasi është mësuar prej kohësh se hakerat kinezë janë dyshuar për një operacion të gjerë përgjimi që ka si objektiv politikanët kryesorë të Partisë Republikane dhe Demokratike në SHBA.
FBI-ja e informoi avokatin, Todd Blanche, javën e kaluar se hakerët arritën të merrnin disa regjistrime zanore dhe mesazhe nga telefoni i tij, por asnjë nga këto informacione nuk kishte lidhje me Trump, tha një nga burimet.
FBI-ja i dha Blanche-it, i cili ka nisur të përdorë një numër tjetër pas këtij incidenti, ato që kishin marrë hakerët, përfshirë komunikimet me familjen, shtoi burimi.
Blanche është i dyti nga dy avokatët e Trump-it që besohet se janë bërë objekt i sulmeve nga hakerët e huaj.
CNN raportoi në gusht se avokati Lindsey Halligan ishte shënjestruar si pjesë e një përpjekjeje të hakerëve iranianë, megjithëse momenti i tentativës dhe përmasat e çdo shkeljeje të mundshme të pajisjeve ose llogarive të saj mbeten të paqarta.
Hakerët kinezë kanë shënjestruar gjithashtu figura të tjera të larta në orbitën e Trump-it, përfshirë Trump-in vetë dhe Zëvendëspresidentin e zgjedhur JD Vance. Objektiva të tjerë ishin dhëndri i Trump-it, Jared Kushner, dhe djali i tij Eric Trump, anëtarë të fushatës Harris-Walz dhe anëtarë të administratës Biden, sipas raporteve të mëparshme të CNN.
Kjo përpjekje e sofistikuar e hakerimit ka shqetësuar zyrtarët e sigurisë kombëtare për shkak të aksesit të thellë që hakerët kinezë kanë marrë në regjistrat e telefonatave dhe mesazheve të personaliteteteve të shquara amerikane.
Zyrtarët amerikanë që po hetojnë fushatën e hakerimit, e cila ka kaluar përmes depërtimeve në kompani amerikane të telekomunikacionit si AT&T, Lumen dhe Verizon, e konsiderojnë këtë sulm si një nga më shqetësuesit lidhur me sigurinë kombëtare në vitet e fundit.
Qeveria kineze ka mohuar akuzat e SHBA-së se ajo qëndron pas këtij sulmi.
Radar.al