Lufta ndaj krimit të organizuar është vendosur në fokusin e task-forcës ndër-ministeriale Shqipëri-Britani e Madhe, ngritur në vitin 2022.
Ministria e Brendshme Home Office thotë se “përmes një bashkëpunimi të përbashkët të paprecedentë Britania e Madhe dhe Shqipëria përmes agjencive ligj-zbatuese kanë rritur partneritetin e tyre operacional kundra krimit të organizuar të përfshirë në transportin e parave, armëve dhe të drogës”.
Gjatë shtatë muajve të fundit “Departamenti i Policisë Kriminale” , “Departamenti policisë Kufitare dhe Migracionit ” në Shqipëri bashkë me NCA “Agjencinë Kombëtare Kundra Krimit” në Britani, janë përfshirë në operacionin e quajtur “Marewood”.
Nga kontrollet në të gjitha pikat kufitare shqiptare tokësore, detare dhe ajrore përfshi aeroportet e Londrës, janë kapur disa qindra mijëra stërlina të përfituara nga kriminaliteti dhe po silleshin drejt Shqipërisë.
Falë shkëmbimit të informacionit me NCA dhe kontrolleve të shtuara në kuadër të operacionit “Marewood” në pikën kufitare të Portit të Durrësit është kapur 7 kilogram kokainë si dhe armë zjarri me destinacion final Britaninë e Madhe.
Ndërsa në disa raste në pikën kufitare të Hanit të Hotit dhe në Aeroportin e Rinasit janë kapur para cash në monedhën Sterlina, duke tentuar për ti futur në Shqipëri.
Për llogari të operacionit “Marewood” në Shqipëri dhe Britaninë e Madhe janë disa persona të arrestuar e akuzuar për vepra të ndryshme penale në pritje të gjykimit në gjykatat shqiptare dhe ato britanike.
Home Office thotë se ë 16 Tetor 2024 sekretarja britanike për punët e brendshme Yvette Cooper dhe ministri i brendshëm shqiptarë Ervin Hoxha, patën diskutime konstruktive me njëri tjetrin, duke u dakortësuar në ardhjen në Tiranë të disa zyrtarëve të lartë të Home Office, përpara Krishtlindjeve për të thelluar bashkëpunimin kundra krimit të organizuar.
Angela Eagle ministre për sigurinë e kufijve dhe azilin deklaroi se “Britania e Madhe dhe Shqipëria po dëshmojmë vullnet në shkatërrimin e grupeve të krimit të organizuar të cilët rekrutojnë njerëz në nevojë dhe sjellin mizori në vendet tona”.
Ndërsa ministri i brendshëm Ervin Hoxha e komenti punën e Task-Forcës si suksesshme duke theksuar se “jemi ekstremisht të kënaqur se çfarë është arritur në këtë bashkëpunim mes agjencive shqiptare dhe ato të Britanisë së Madhe në përballjen me krimin e organizuar. Kemi arsye të forta të besojmë se ky bashkëpunim do të forcohet më tej duke e çuar përpara”./TCH
Kujtojmë se pak kohë pas deklaratave raciste të Sekretares së Brendshme, Suella Braverman ndaj emigrantëve shqiptarë, e ashpër ka qenë dhe gjuha e përdorur nga ministri britanik të Emigracionit, Robert Jenrick. Në një video-mesazh për mbështetësit e tij, ministri ka kërkuar që shqiptarët që shkojë në Britani të arrestohen nga autoritetet dhe të rikthehen në Tiranë.
“Shqipëria nuk është një vend i shkatërruar nga lufta dhe është shumë e vështirë të argumentohet se kërkesat për azil janë legjitime”- tha Braverman.
Braverman tha se shqiptarët gënjenin për arsyen përse largoheshin nga vendi dhe shumë prej tyre i etiketoi si persona me rekorde kriminale.
Ndaj kësaj deklarate është përgjigjur edhe kryeministri, Edi Rama i cili i konsideroi deklaratat e saj si “britmë në çmendinë”. Kreu i qeverisë pati deklaruar asokohe se ishte përgjegjësi e Britanisë që të bashkëpunonte për të menaxhuar situatën me emigrantët e paligjshëm shqiptarë që mbërrijnë me gomone në Mbretërinë e Bashkuar.
Komente këto të Ramës që solli më vonë edhe një marrëveshje të përbashkët mes dy qeverive, që do mundësonte uljen e shqiptarëve që shkonin në Britaninë e Madhe përmes kanalit La Mansh.