Policia e Elbasanit ka zbardhur të tjera detaje nga kanosja e një personi ditën e djeshme. Nga hetimet është zbuluar se autori i kërcënimit është një mësues 34-vjeçar.
Policia shton se ky i fundit dyshohet, sipas kallëzimit të të riut, se ka tentuar ta djegë me benzinë, me pretendimin se i ka prishur imazhin si mësues.
Njoftimi:
Në vijim të informacionit të dhënë dje, për kanosjen e shtetasit I. K., ju bëjmë me dije se nga hetimet e mëtejshme të kryera nga specialistët për Hetimin e Krimeve të Komisariatit të Policisë Elbasan, me qëllim zbardhjen e rrethanave të këtij rasti, rezultoi se autori i dyshuar, shtetasi E. K., 34 vjeç, me profesion mësues, e ka kanosur shtetasin I. K., sepse pretendon se ky i fundit i ka dëmtuar imazhin si mësues.
Më tej, në deklarimin e tij, shtetasi I. K. pretendon se përveç kanosjes me fjalë, 34-vjeçari ka hedhur në drejtim të tij, një bidon dyshohet me lëndë djegëse (benzinë) që e ka marrë në automjet.
Materialet procedurale i kaluan Prokurorisë së Elbasanit, për të vijuar hetimet për veprat penale “Kanosja” dhe “Vetëgjyqësia”.