Parlamenti i Gjeorgjisë ka miratuar projektligjin që kufizon të drejtat e LGBTQ, një masë që i bën jehonë ligjeve të ngjashme të miratuara në Rusi.
Projektligji u votua ditën e sotme pasi u prezantua nga partia populiste në pushtet “Ëndrra Gjeorgjiane” në fillim të këtij viti.
Mësohet se ligji përfshin ndalimin e martesave të të njëjtit seks, birësimin nga çiftet e të njëjtit seks, kujdesin për afirmimin e gjinisë, miratimin publik të marrëdhënieve dhe njerëzve LGBTQ+ dhe paraqitjet e tyre në media.
Kjo shtrihet në nxjerrjen jashtë ligjit të ngjarjeve të komunitetit dhe shfaqjeve publike të flamurit të ylberit, si dhe censurimin e tyre në filma dhe libra.
Udhëheqësit e “Ëndrrës Gjeorgjiane” pretendojnë se ligji është i nevojshëm për të mbrojtur standardet morale në vend.
Të drejtat e LGBT janë një çështje e diskutueshme në Gjeorgji, me sondazhet që tregojnë mosmiratim të përgjithshëm të marrëdhënieve të të njëjtit seks dhe marshimet e Krenarisë që shpesh vihen nën sulm fizik. Kushtetuta e vendit gjithashtu ndalon martesat e të njëjtit seks.
Presidentja Salome Zourabichvili, një kritike e Ëndrrës Gjeorgjiane, thuhet se ka deklaruar se do të bllokojë projektligjin. Megjithatë, qeveria dhe aleatët e saj kanë mjaft vende në parlament për të përmbysur veton e saj. Kompetencat e presidentit janë kryesisht ceremoniale.
Në miratimin e ligjit, Gjeorgjia ndjek hapat e Rusisë, drejt së cilës qeveria në pushtet duket se po anon me afrimin e zgjedhjeve të tetorit, pavarësisht nga aspiratat e Tbilisit për t’u bashkuar me BE.
Autoritetet ruse gjatë dekadës së kaluar ndaluan gjithashtu miratimin publik të “marrëdhënieve seksuale jotradicionale” si dhe kujdesin për afirmimin e gjinisë, ndër masa të tjera.