Ardhja e diasporës kosovare për pushimet verore ka shtuar ndjeshëm lëvizjen e automjeteve në Rrugën e Kombit, me destinacion Kosovën përmes kalimit kufitar Vërmicë. Në fund të muajit korrik, fluksi i mjeteve dhe udhëtarëve është rritur, ndërsa mijëra bashkatdhetarë që jetojnë dhe punojnë në vendet e Evropës po kthehen në vendlindje për të kaluar pushimet e muajit gusht.
Për shkak të këtij fluksi, në pikën kufitare të Vërmicës regjistrohet ngarkesë më e madhe, veçanërisht gjatë orëve të mesditës, kur zakonisht krijohen radhë automjetesh në hyrje të Kosovës.
Për të shmangur pritjet e gjata, autoritetet doganore dhe policore të Kosovës po aplikojnë procedura të përshpejtuara të kontrollit kufitar, duke synuar përpunimin sa më të shpejtë të udhëtarëve dhe automjeteve.
Rruga e Kombit mbetet korridori kryesor tranzit për diasporën kosovare që udhëton nga vendet e Evropës drejt Kosovës gjatë sezonit veror, ndërsa pritet që fluksi të vijojë të rritet edhe në ditët në vijim.