Komisioni Europian ka intensifikuar përballjen me Meta-n, duke kërkuar ndryshime në disa prej funksioneve kryesore të Facebook dhe Instagram, të cilat sipas vlerësimeve paraprake nxisin varësinë e përdoruesve, veçanërisht të fëmijëve dhe adoleshentëve.
Sipas Komisionit, Meta ka shkelur Aktin e Shërbimeve Dixhitale (DSA), pasi platformat e saj janë ndërtuar me mekanizma që favorizojnë përdorimin e zgjatur. Në qendër të shqyrtimit janë funksione si lëvizja e pafund e përmbajtjes (infinite scroll), riprodhimi automatik i videove (autoplay), njoftimet push dhe algoritmet e rekomandimit, të cilat, sipas Brukselit, i mbajnë përdoruesit të angazhuar për periudha më të gjata.
Autoritetet europiane i kanë kërkuar Meta-s të rishikojë këto elemente të dizajnit, duke kufizuar ose eliminuar funksione si infinite scroll dhe autoplay, si edhe të forcojë mekanizmat që ndihmojnë përdoruesit të kontrollojnë kohën e kaluar në platforma. Komisioni vlerëson se masat e deritanishme të kompanisë nuk janë të mjaftueshme për të ulur rrezikun e varësisë nga rrjetet sociale.
Nga ana e saj, Meta ka kundërshtuar konkluzionet paraprake, duke theksuar se ka investuar në mjete për mbrojtjen e të rinjve, kontrolle prindërore dhe funksione për menaxhimin e kohës së përdorimit. Kompania do të ketë mundësinë të paraqesë argumentet e saj gjatë procedurës.
Nëse hetimi përfundon me konstatimin e shkeljeve, Meta mund të përballet me një gjobë që arrin deri në 6% të të ardhurave të saj globale vjetore, një shumë që mund të kalojë 12 miliardë dollarë.