Policia e Durrësit ka arrestuar në kohë rekord autorin e dyshuar të grabitjes së xhiros ditore të dyqanit Vodafone, falë reagimit të menjëhershëm të Forcës së Posaçme Operacionale “Shqiponja”.
Sipas njoftimit zyrtar, ngjarja ndodhi rreth orës 15:15 në lagjen nr. 16 të Durrësit, ku shtetasi G. R., 37 vjeç, dyshohet se hyri në ambientet e dyqanit dhe mori me forcë rreth 100 mijë lekë të rinj, që përbënin xhiron ditore të biznesit, për t’u larguar menjëherë nga vendngjarja.
Menjëherë pas sinjalizimit, shërbimet e Forcës Operacionale “Shqiponja”, në bashkëpunim me efektivët e Komisariatit të Policisë Durrës, organizuan kontrolle në terren dhe arritën ta lokalizonin e ta kapnin të dyshuarin në lagjen nr. 6 të qytetit.
Grupi hetimor, nën drejtimin e Prokurorisë, po vijon veprimet për zbardhjen e plotë të rrethanave të ngjarjes dhe dokumentimin ligjor të saj.
Materialet procedurale i janë referuar Prokurorisë për vijimin e veprimeve të mëtejshme.