Administrata e presidentit Donald Trump ka miratuar rregulla të reja që kufizojnë kohëzgjatjen e vizave për studentët e huaj, vizitorët e programeve të shkëmbimit kulturor dhe gazetarët, në kuadër të politikave më të ashpra të emigracionit.
Rregulli i ri, i publikuar nga Departamenti i Sigurisë Kombëtare (DHS), parashikon vendosjen e afateve fikse për vizat e tipit F (studentë), J (vizitorë të shkëmbimit) dhe I (gazetarë dhe përfaqësues të medias). Aktualisht, këto viza jepen në bazë të kohëzgjatjes së programit të studimit, punësimit ose aktivitetit në Shtetet e Bashkuara. Rregullorja do të hyjë në fuqi 60 ditë pas publikimit, në varësi të procesit të shqyrtimit nga Kongresi.
Sipas ndryshimeve, vizat për studentët dhe pjesëmarrësit në programet e shkëmbimit nuk do të kenë më një vlefshmëri më të gjatë se katër vjet. Ndërkohë, vizat për gazetarët e huaj do të kufizohen në 240 ditë, ndërsa për shtetasit kinezë vlefshmëria do të jetë vetëm 90 ditë. Mbajtësit e këtyre vizave do të kenë mundësi të aplikojnë për zgjatjen e tyre.
Mediat ndërkombëtare raportojnë se kjo është pjesë e politikës së administratës Trump për forcimin e kontrolleve mbi emigracionin, e cila ka nisur që prej rikthimit të tij në Shtëpinë e Bardhë në janar 2025. Gjatë kësaj periudhe janë ndërmarrë masa të shumta, përfshirë revokimin e vizave studentore dhe kartave të gjelbra në raste të caktuara, si edhe kufizime të tjera ndaj emigracionit të ligjshëm.
DHS argumenton se ndryshimet janë të nevojshme për shkak të rritjes së ndjeshme të numrit të mbajtësve të këtyre vizave. Sipas të dhënave zyrtare, gjatë vitit 2024 u regjistruan mbi 1.8 milion pranime me viza studentore, më shumë se 500 mijë vizitorë të shkëmbimit kulturor dhe rreth 37 mijë viza për anëtarë të medias.
Departamenti thekson se shtimi i numrit të vizitorëve e bën më të vështirë monitorimin e statusit të tyre gjatë qëndrimit në SHBA dhe se janë konstatuar raste të shumta të personave që kanë tejkaluar afatet e lejuara të vizave. Sipas rregullores së re, ata që dëshirojnë të zgjasin qëndrimin do të duhet të aplikojnë pranë DHS ose të largohen nga SHBA dhe të aplikojnë për rihyrje sipas procedurave të përcaktuara.